Sekeda Chara Ngemansangka Penau Diri Dalam Jaku Iban
30 Jan 2012 Leave a Comment
in Iban, jaku, kenang, kereja, macha, pengerindu, randau Tags: belajar, internet, kaul, landik, nembiak, ngajar, randau, sekula
-
- Ngaga blog jaku Iban.
Taja pan ba sekeda orang ti enda nulis ngena jaku Iban, pengawa nulis nya tau bendar nyadika sebengkah chara ti betul belajarka vokabulari dikena nerangka pasal pengidup diri empu enggau pengerindu diri empu, lalu mega berundingka chara dikena nyeliahka diri ari ngaga penyalah grammar. Mayuh orang bisi penanggul ba nama utai ti deka ditulis. Siti ari chara lama ti dikena kitai ‘ngansak’ diri empu nulis ninting hari iya nya nulis diari dalam jaku Iban (tauka journal), lalu chara ke baru agi baka ti suah dikena orang iya nya nulis dalam blog. Mayuh topic ti suah dikenang orang baka pengawa kitai belajar, menua diri empu, jaku diri empu, tauka pengawa nyalin ari jaku bukai ngagai jaku Iban. - Nulis diari berita.
Sebengkah agi chara dalam pengawa nulis ti dikereja sekeda orang lalu tau mega ngasuh sida leju nuliska diari pasal pengawa ti dikereja sida ninting hari, nya nuliska kenang sida pasal berita ti dibacha enggau didinga sida tiap hari. Enti kitai deka mai peragam baka berita nya tau ngerembai (ambi ke chunto “Ba penemu aku, pengawa ngundi deka diatur dalam bulan Mac tu ila”), nya deka ngujungka nuan macha pos nuan ke dulu agi, lalu bisi endur nuan ngemetulka penyalah dalam tulis nuan nya. - Nyadi kaban dalam laman web jaku Iban. Bisi sekeda laman web meri petua tauka lalau penemu sekali seminggu tauka sekali sehari pasal pelajar jaku Iban ti dikirumka terus ngagai email nuan. Enti telefon bincing nuan ulih dikena nuan nerima email, nuan ulih macha petua-petua nya sekumbang nuan di rantu jalai nurun kereja tauka nurun sekula. Tang kitai enda tau enda ingat, enda semua petua pelajar nya diatur nitihka ikas pelajar ti benung ditithka kitai, lalu petua-petua nya semina tau diambika penemu tambah aja.
- Ningka MP3. Taja pan bebelika lagu dalam internet diatu nyau semakin dikerinduka orang, tang nadai mayuh orang nemu program radio mega ulih diambi ari internet baka jaku randau berekod tauka leka main. MP3 ti baka tu mega ulih diambi lalu disimpan enggau enda bebayar.
- Ningka lagu Iban. Taja pan kitai semina ningaka lagu seraya kitai ti ngereja pengawa bukai iya ulih mantu kitai nelebaka diri enggau entak sebut enggau patah nyawa jaku Iban.
- Macha leka lagu jaku Iban. Taja pan semina ningaka lagu Iban nya chara ti mudah dikena belajarka leka jaku enggau chara ngingatka, nuan mega deka bulih utai ti baru ari ti macha leka lagu diseretaka enggau ngena diksyenari. Enti leka lagu nadai diseretaka dalam kerubung CD lagu, nuan tau ngambi leka lagu nya ari internet, tang sekeda laman web deka nuliska leka jaku ti salah dikena sida nyaga diri ari ti ngelanggar hak nulis.
- Belagu lagu Iban. Ba ikas ti nangkanka nya udah nuan mereti sereta ulih ngingatka munyi lagu, manah agi lagu nya disadaka. Taja pan sekeda entak sebut leka jaku bisi dibali mimit dikena ngemetulka endur iya dalam lagu, tang mayuh agi leka jaku nya sebaka enggau leka jaku ti dikena berandau besehari-sehari.
- Nulis kenang pandak pasal wayang tauka bup. Sebengkah agi chara ti mudah dikena nuan matih diri empu nulis dalam jaku Iban iya nya nuliska kenang pandak pasal wayang ti benung dipandangka ngagai mensia mayuh.
- Kelaungka sepuluh lambar bup ke terubah. Enti nuan diasuh macha sebuah bup jaku Iban, tauka macha enggau lubah, nuan tau ngelaung macha sepuluh lambar ti terubah dalam bup nya. Sepuluh lambar terubah dalam tiap bup ditagaka dikena nerangka pasal bup nya lalu ngundan mayuh vokabulari ti tinggi-tinggi, lalu bedau bisi isi cherita dikena mantu nuan meretika nama utai ti deka nyadi sereta meransang nuan ngebakka lambar ti nangkanka nya.
- Macha bup ti ngundan mayuh jaku randau. Tiap kali nuan deka meli bup nuan tau ngebakka lambar bup dikena nuan ngiga enggau nentuka iya ti ngundan mayuh jaku randau (dialogue) terus, lalu nya tau bendar nyadika lalau ti manah. Jaku randau mudah agi diperetika enti dibandingka enggau teks deskriptif (baka ensera, cherita lama, leka main etb), lalu sebaka bendar enggau jaku ti benung dipelajarka nuan.
- Macha komik jaku Iban. Sebaka enggau bup ti ngundan mayuh jaku randau, bup komik mega mudah diperetika, lalu ngundan mayuh leka jaku ti berambai sebaka enggau leka jaku ti disebut. Bup komik jenaka suah agi ngundan leka jaku tundi ti mar diperetika, nya alai anang enda milih bup komik ti mudah dibacha lalu diperetika. Bup komik pasal cherita pejalai orang suah agi mudah dibacha, enti dibandingka enggau bup komik jenaka.
- Macha majalah jaku Iban. Jaku dikena dalam majalah mudah agi diperetika ari jaku dalam bup lalu majalah mega mudah agi dibeli, dikembuan tauka di bai mindah-mindah.
- Ngaga blog jaku Iban.
Selamat Hari Krismas enggau Taun Baru 2012
24 Dec 2011 Leave a Comment
Meri Selamat Hari Krismas enggau Taun Baru 2012 ke bala pemacha. Arapka taun-taun ti deka datai tu ila mai tuah belimpah ke kita sebilik.
Nulis enggau ngeluarka Bup Teks Pelajar Jaku Iban KSSR Taun 2 & 3
25 Jul 2011 2 Comments
Kira bisi 3 minggu tu udah, aku bisi ditanya siku bakih, sekali ke aku besedia dibai orang nyediaka bup teks Pelajar jaku Iban ke sekula primari. Aku nyanggup lalu iya pan ngasuh aku ngaga siti perambu ti lalu dikirumka kami duai ngena e-mail. Dua minggu udah perambu aku nya dianjung ngagai upis pengeluar bup di menua tu, dia aku bisi nerima kangau telefon ari siku pemesai ti bekereja ba upis nya. Iya meri aku tabi puji laban aku dipilih nyadi siku penulis bup teks ti benung diatur sida nya.
Sekumbang ti nganti diri deka nurun ngulu sebengkah aum ke bala penulis, dia runding aku mayuh peragam. Ulih tauka enda kini aku nangkup pengawa nulis bup teks? Baka ni penyukup jam ke ditagaka aku endur ngereja lalu nembuka pengawa tu? Nama penanggul ti deka nuntung lalu ngemuntanka pengawa aku nyadi kaban penulis nya ila?
Kena 19 ngagai 23 haribula Tujuh tu tadi, aku enggau bala bakih ti dipaduka opis pengeluar bup menua tu bisi ngulu aum ti ngasuh kami ngaga langgur dikena nulis bup teks Pelajar jaku Iban ke dikena bala nembiak ba Kurikulum Standard Sekula Primari (KSSR) Taun 2 enggau Taun 3. Bup nya ditagaka deka baluh dikena sida belabuh ari pun taun 2013 nyin ila. Endur kami ti diau enggau bekereja maya nya kemari nya ba sebengkah hotel ti tebilang ti nengeri Kuching. Sekumbang ti ngaga langgur nya kemari, kami bala penulis endang seruran diiring bala penilai ti dipaduka upis Pelajar enggau upis Pengeluar Bup ari asuh Upis Menteri Pelajar menua tu. Mayuh bendar pekara ti ditanya sida ti nyadi penilai ke bala kami penulis, laban chara nya dikena sida mantu kami nyerenihka asil pengawa ti digaga kami nya.
Ba aku siku, kelimpah ari raban penilai kami nya, bala penulis bukai ti endang bisi peneleba ba pengawa tu mega beguna bendar nyadika lalau bala kami ti baru tu.
Udah post tu ila, nyangka nya lama aku enda ulih bejari nuliska entry ke baru, tang aku enggau naka ulih ngenataika buah kenang aku enti aku bisi endur enggau maya ke lapang.
Nadai Konsep Jam
20 May 2011 Leave a Comment
in aktiviti, baju, bantu, belajar, belalauka, kenang, kereja, menua, nyelai, pekunsika, pendiau, pengidup, penimpang, penyelai Tags: Amazon, Amondawa, bansa, Brazil, Britain, bulan, bungas, daya, hari, idup, jam, kampung, maya, minggu, nyelai, pansik, pengelantang mensia, pengidup, professor, raban, rampa menua, randau, taun, university
Sebengkah raban bansa ba kandang menua Amazon ti nadai bekonsepka jam dalam daya idup sida, nitihka sebengkah pansik ti dipejalaikan raban pemansik ari Britain
- Raban bansa Amondawa tu nadai ngembuan leka jaku jam, hari, minggu, bulan enggau taun dalam daya idup sida.
Raban bansa Amondawa ari Brazil nadai leka jaku “jam”, “hari”, “minggu”, “bulan” tauka “taun” – lalu nadai siku ari bansa sida tu ditemu umur.
Pengidup sida dibagi ngagai siang enggau malam, maya pengujan enggau maya kemarau aja.
Professor Chris Sinha ari Univeristy of Portsmouth, ti nyadika tuai bala pemansik nya madahka: “Jam nadai dalam pengidup orang nya baka ti bisi ba pengidup kitai tu. Sida idup dikelingi utai ti nyadi, ari ti meda penyadi utai nya ba sebengkah-sebengkah maya aja.”
Dulu ari tu, maya enggau jam semina dipelabaka dikembuan semua raban bansa.
Raban bansa Amondawa ti keterubah iya ditemu dalam taun 1986, lalu sida endang udah bekenaka perengka-perengka baka gari ti dikena orang menua barat. Sida udah belajarka jaku Portugese lalu sida mega beserebanka jaku sida empu deka pupus.
Kampung tropika Amazon udah kala ditebang lebih ari ENAM KALI jampat agi ari ti kala dikereja ba taun nyin kemari.
Dunya ngingatka di Chernobyl, diemba penusah nuklear
26 Apr 2011 2 Comments
in aktiviti, jereki, kenang, kereja, macha, menua, pemati, pendiau, pengidup, penimpang, penyakit, penyelai, randau Tags: atom, kuasa, penanggul, pengelantang mensia, pengerusak, rampa menua, randau, tanggul
KIEV (AFP) – Kena hari Dua, dunya sekali agi ngingatka penusah ketegal dituntung pengerusak nuklear ti pengabis balat di dunya tu iya ti udah nyadi di menua Chernobyl di Ukraine, diemba mimpi rawan udah bekau dituntung penusah tanah berenyang di Jepun.
Tumu pagi 26hb April, 1986, bala pekereja ba palan kuasa atom di Chernobyl udah bejalaika uji enggau pansik sida atas reaktor lumur empat ti enda mukai-mukai udah nya penyilap pejalai pengawa sida ngujungka palan nya meletup betangkan-tangkan.
Debu enggau uras ti beracun radioaktif ngelamun kandang endur nya, ngubah rampa kandang endur nya baka sebengkah rampa baka ti diayanka dalam genera, lalu berebak enggau nya mega debu enggau uras beracun nya dipuputka ribut ngagai kandang menua bukai ke sebelah menua Soviet baka Belarus enggau Rusia lalu pia mega datai ngagai timur menua Eropa.
Dua iku pekereja mati tekala nya lebuh palan nya meletup lalu 28 iku bala penyelamat enggau pekereja ke bukai mati ketegal kena pandang radiasi berachun beberapa bulan udah nya. Bepuluh-puluh ribu orang udah diansak pindah ninggalka endur nya laban nangika pemalat pandang radiasi berachun ti tau ngerusak pengerai mensia mayuh.
Presiden menua Rusia Dimitri Medvedev bisi mansutka penerang ti endur iya deka ngabas sebengkah tanda pengingat di Chernobyl kena hari Dua beserimbai enggau pengerami ngingatka penusah nya, ti endur iya deka sereta enggau Presiden Ukraine, Viktor Yanukovych.
Kepala gerija Ortodoks menua Rusia iya nya Patriach Kirill deka nguluka mensia mayuh besembiang di nengeri Kiev tumu pagi hari Dua, ti endur iya deka mangkung luching betul-betul kena pukul 1:23 pagi – iya nya senutuk enggau maya palan Chernobyl ti meletup nya suba – dikena ngelai pengawa ngingatka penusah nya.
Udah nya iya deka mansang ngagai palan ti dituntung pengerusak nya lalu nguluka sembiang Easter ba sebuah chapel ti endang bisi dalam genturung pendiau di Chernobyl lalu udah nya nguluka sembiang semak tanda pengingat ba palan kuasa ti enda dikena agi nya.
Tang senutuk enggau pengerami dikena ngingatka penusah Chernobyl nya tanggul laban penusah dibai tanah berenyang di menua Jepun ti mega ngujungka pengerusak palan reaktor kuasa nuklear di Fukushima.
Menua Jepun udah ngeluarka sebengkah tangkan pasal penusah nya ba ikas ketujuh penyukat penusah atomik entarabansa, sebaka pemalat enggau penusah di Chernobyl, lalu penusah di Fukushima nya udah mai mayuh jaku tanya sekali ke penusah ari kuasa atom nya kelalu besai ditapi mensia.
Kompeni ti ngemataka pejalai kuasa atom di Fukushima, Tokyo Electrical Power Co. (TEPCO) udah tebuai ari kontrak sida ketegal polisi dikena belalaika penerang pasal penanggul, ti udah ngayanka pengenggai perintah Soviet ngeluarka penerang tekala nya pasal penusah Chernobyl dalam taun 1986.
Maya nya, Moscow udah ngelalaika penusah Chernobyl dalam pengelama tiga hari, ti udah nya berita lalu dipansutka agensi berita TASS kena 28hb April udah bekau palan kuasa nuklear Forsmark di Sweden bisi ngeluarka ripot pasal ikas pandang radiasi ti nyelai.
Dalam taun 1986 enggau 1987, perintah menua Soviet udah nganjung lebih setengah juta iku pekereja penyelamat, dikena mantu meresi kandang palan kuasa atom nya enggau menua ti bekelingi enggau nya, ti endur mayuh orang enda nemu pemisa pandang radiasi berachun di endur nya ngagai pengerai mensia mayuh.
“Ba penemu aku, dalam dunya ti sereba baru tu kitai enda tau enda belajar ari pengilap kitai ti udah ngujungka penusah Chernobyl tu enggau penusah ti udah nuntung menua Jepun, ti endur kitai enda tau enda madahka orang mayuh,” ku Medvedev madahka bala pekereja enggau pakar di Kremlin.
“Dunya tu lusing sereta keru bendar lalu kitai semua tu udah rat bendar kaul enggau pangan diri ti endur sapa-sapa enda ulih balalaika utai ti bendar, ti tau ngujungka penusah deka nuntung mensia mayuh enggau mai pengerugi ti besai ba belanja.
Taja pan udah dituntung penusah Chernobyl, penemu ti enda sebaka udah didinga betaun-taun entara agensi-agensi dalam gerempung UN pasal penyampau pemati ti bekaul terus enggau penusah nya, disadang manggai ngagai bepuluh-puluh ribu iku.
Sekeda bala pakar bisi madahka penanggul pengerai ti balat agi diasaika orang di Chernobyl iya nya penanggul ba runding (mental) ari ba tubuh (physical), ti endur bala orang ti kena tuntung penusah nya seruran remban ketegal agi ingatka penusah April 1986 nya, ti mega ngujungka sida enda tau enda pindah ngagai endur bukai ti jauh agi ari menua sida empu.
Dalam taun 2005, sekeda ari agensi-agensi Gerempung Pengerai Bansa (World Health Organization), bisi mansutka penerang ti madahka enda kurang ari 4,000 iku orang udah mati ketegal kena pandang radiasi berachun nya.
Tang bala kaban Komiti Sains ba pekara pasal Pandang Rachun Atom Gerempung Bansa (UNSCEAR) udah netapka kelimpah ari 30 bengkah pemati udah bekau penusah nya, semina 19 iku bala orang ti endang udah dituntung penusah nya udah mati dalam taun 2006 ketegal mayuh bengkah pekara.
Kelimpah ari 6,000 iti kes kanser tairoid – sebengkah penyakit kanser ti ulih diubat – ketegal ti nguna tusu ti kamah, nadai penerang ti amat bekaul enggau penuh dipandang rachun radiasi, baka ti dipansutka dalam ripot sida ba bulan Dua tu tadi.
Tang gerempung kempen pengemata pemanah rampa menua Greenpeace dalam taun 2006 udah nuduh agensi-agensi dalam UN ti udah ngayan ke penerang ti enda betul pasal penyampau pemati dituntung Chernobyl, ti nyebut enda kurang ari 93,000 kes ti balat ketegal dituntung penusah nya.
Udah penusah nya, peringtah Soviet udah nirika palan pengenduh konkrit ti sementara dikena ngelindung injin reactor ti udah dirusak nya, tang sida mengkang bisi pengirau ke penegap palan pengenduh nya.
Sebengkah tanda pengingat benung digaga semak endur nya lalu iya ke bukai deka mega didirika semak enggau injin reaktor ti udah rusak nya jemah ila.
Tang pekara ti nyadika peransang nya Bank Eropa ke Penyeruri enggau Pemansang (EBRD), ti bejalaika projek, agi begunaka bantu penuh ari duit turu nya dikena nembuka pengawa sida. Ba sebengkah aum ba minggu nyin kemari, bisi 550 juta euro (RM2,406 juta) dipesetujuka dalam aum, tang sida agi begunaka 740 juta euro.
Chernobyl agi neruska pengawa ngeluarka kuasa taja pan perintah Soviet Union udah tumbang. Injin reactor lumur dua udah ditutup dalam taun 1991, injin lumur satu ditutup dalam taun 1997 tang injin lumur tiga agi terus diidupka nyentuk ngagai bulan Duabelas 2000.
[dibali ari: http://news.yahoo.com/s/afp/20110425/sc_afp/chernobylnuclear25yearsukrainejapan_20110425145840 ]
Cherita begambar mega tau dipeda ba laman tu: http://www.kiddofspeed.com/ awakka bisi ke lalau enggau tangkan kitai ba gaya pemalat pengerusak reta tengkira enggau nyawa dituntung penusah penanggul kuasa atom.
Tabung RM21 juta Dikena Mantu Bala Penulis Ngeluarka Bup Diri Empu
23 Apr 2011 Leave a Comment
KUALA LUMPUR: Berengkah ari taun tu, bala penulis ari menua tu empu diperansang minta duit bantu ari tabung RM21 juta dikena sida ngeluarka bup sida empu.
Pengarah Librari Bansa, Datuk Raslin Abu Bakar madahka duit bantu nya deka diberi ngagai bala penulis ti udah nembuka bup sida.
“Bala penulis tau nganjung asil kereja sida ngagai komiti ti deka meresa bup sida nya bepelasarka atur-atur ti udah ditetapka,” ku iya madahka ngagai bala pemberita ba pengerami madangka bup bacha entarabansa KL 2011 ditu kena hari enam tu tadi.
Bala penulis ti udah kena pilih deka diberi RM25,000 siku-siku lalu library bansa deka meli lalu nyadung bup-bup nya ngagai librari-librari di serata menua tu, ku Raslin.
Tang, bup-bup ti dikeluarka nya enda tau enda manah ke kereban bacha raban orang di menua pesisir.
Bisi 16,044 iti bup udah dikeluarka dalam 2008, 15,767 iti dalam 2009 lalu 15,756 iti dalam 2010.
Pengerami mandangka bup bacha ti diatur ba Putra World Trade Centre kena hari Lima nya kemari deka tembu kena 1 May tu ila. – Bernama
Nama Kebuah Aku Nudukka Blog
15 Mar 2011 Leave a Comment
in aktiviti, belalauka, bidik, kereja, kunsi, ngayanka, pengawa Tags: arus, internet, landik, main, ngayanka, tampak
Enti aku ditanya orang munyi tu, “Nama kebuah nuan nudukka blog?”. Tanya ke munyi nya subjektif, reti nya begunaka saut lebih ari siti, lalu nadai saut ti betul tauka engkeman. Awakka aku neruska karang tu enggau saut ke serius agi. Aku nudukka blog ari ketegal pengerindu aku bekunsika sebarang utai ti datai ba runding aku empu. Kitai sama nemu, runding siku-siku kitai tu bisi nya betul, lalu enda kurang nya enda betul.
Orang nudukka blog ari mayuh ketegal. Tang aku deka ngenang dua bengkah ketegal ke bebatang agi – ketegal rindu nulis, enggau ketegal ngulihka penguntung ari blog.
Ba kes aku empu, aku nulis ari ketegal rindu, tauka munyi jaku rama kitai – nulis kena ‘main-main’ aja. Nya kebuah kita meda blog aku tu jarang amat dikemataka aku. Enti lebuh buah runding bisi datai lalu nulis pan teperansang, aku ulih nulis dua-tiga iti entri dalam sebulan; tang enti penemu nadai mansa sekali, sampai dua-tiga bulan mega blog aku tu enda diisika sebarang entri.
Bisi orang nudukka blog laban deka ngulihka untung nengah dunya internet. Raban orang begunaka jam enggau pengeliat ati ti tinggi. Sida iya enda ulih ‘main-main’ maya nuliska entri, laban enggai ke dipeda bala pemacha enda bebendar. Raban sida tu nuliska entri blog laban deka ngelakuka dagang sida empu; ngulihka duity ari blog diri empu; nuliska entri ari asuh pengaji sida; lalu bulih upah ari ti nuliska entri dalam blog sida, tauka blog orang bukai.
Ba penemu bala orang di landik pasal pengawa blog (blogging), bisi dua bengkah peransang ti ngansak orang nuliska entri dalam blog, iya nya peransang primari enggau peransang sekondari. Peransang primari nya dikena raban orang ti serius ba pengawa blogging. Sida iya ngasaika diri enda tau enda nuliska entri laban ngarapka bisi upah tauka upah. Lalu peransang sekondari nya dikena raban penulis blog ti nulis ke ‘main-main’ aja, baka aku! Taja pan bidi dua bengkah peransang ti dikena orang nuliska entri dalam blog ti enda sama, tang kedua-dua bengkah peransang tu tau dikena enggau chara betukar-tukar. Nya bepanggai ba chara enggau peneka siku-siku blogger.
Enggau nya, selamat beblog ke semua raban blogger!
Banding pengawa taun tu enggau taun 2010 nyin kemari
06 Feb 2011 Leave a Comment
in pengawa, sekula Tags: belajar, nembiak, ngajar, randau
Apu! Nih! Lama bendar aku udah enda ngemas blog tu. Ukai enggai, ukai enda rindu agi ke pengawa nulis. Tang pengawa bukai ke bebatang agi ke mayuh begunaka jam enggau tulang tu. Taun tu berasai mayuh agi pengawa aku ba sekula. Enti taun nyin kemari (2010) aku semina diasuh ngajar 19 kali dalam seminggu. Taun tu aku diasuh ngajar 25 kali dalam seminggu, iya nya nambah 6 kali ari taun nyin kemari.
Mai aku ke diasuh ngajar 19 kali seminggu ba taun nyin kemari laban aku diberi pengawa ngemataka sereta ngemas semua data sekula enggau pengajar enggau staf-staf ti ukai pengajar. Ba taun tu, taja pan aku agi ngereja pengawa nya, tang penyampau kali aku masuk kelas bisi nambah, munyi ti disebut aku dulu tadi.
Ba pun taun nyin kemari mega, opis pelajar endang bisi meri aku surat padu mangku pengawa Pengajar Data ti endur aku semina tau ngajar enda kurang ari 12 kali seminggu. Peratika leka jaku “enda kurang”. Reti nya, kepala sekula tau ngasuh aku ngajar suah ari 12 kali, tauka sebaka enggau penyampau kali baka ti diagihka iya ngagai pengajar bulai.
Ba tu, aku nadai mayuh bantah, laban batang pengawa aku ba sekula, iya nya ngajar – ngiring sereta ngiri penemu enggau penau ngagai bala nembiak.
Juluk Ati ba Taun Baru
08 Jan 2011 2 Comments
in bantu, basa, belajar, belalauka, bidik, gerija, jaku, kaul, kenang, kereja, kunsi, lalau, macha, menua, nembiak, ngajar, ngayanka, pekunsika, pendiau, pengarap, pengawa, pengerai, pengerindu, pengidup, randau, rebak diatu, rebak dudi, tanggul, Uncategorized Tags: basa, belajar, kaul, ngajar, ngayanka, penanggul, pengarap, pengelantang mensia, pengerai, sekula, tanggul
Juluk ati ba taun baru nya sebengkah semaya orang siku-siku enggau diri empu, dikena ngulihka juluk ati, nembuka sesebengkah projek, tauka ngemanahka agi pendiau enggau pengidup diri empu. Ubah ba pendiau enggau pengidup tu disebutka tau pulai ke penguntung orang siku-siku. Juluk ati ba taun baru nya sesebengkah pekara ti deka dikereja ba taun ti deka datai. Sekeda chunto juluk ati nya baka suah agi nulung orang ti suntuk, ngenegapka agi runding diri empu, tauka ngangkatka penyiru diri empu ngagai pemanah enggau pemeresi rampa menua.
Ba pengarap mega bisi nyau deka sebaka enggau juluk ati taun baru tu. Rambau taun baru orang ti bepengarap Judah, siku-siku orang nya deka berunding enggau dalam nama penyalah ti udah dikereja iya ba orang bukai sepemanjai taun ti dulu, lalu sama-sama ngaku sereta ngampun penyalah pangan diri. Orang ti bepengarap Kristian mega bisi juluk ati ti sebaka enggau tu lebuh maya sida ngintu musin Lent, taja pan tuju ke bendar nya bekaul enggau pemeri. Ba sebarang pengarap ti dipegai orang siku-siku, tuju ngembuan juluk ati ti bendar nya ngemanahka agi pendiau diri empu ninting taun.
Sekeda juluk ati taun
- Ngangkatka pemanah pengerai diri: ngurangka pemerat tubuh, makai ngena atur ti menyana, ngurangka ngirup arak, ngetu nginsap;
- Ngangkatka pemanah chara bebelanja: nelesaika utang, nyimpan duit;
- Ngangkatka pemanah pengawa: ngiga pengawa ti manah agi;
- Ngangkatka pemanah pelajar: ngangkatka gred dalam pelajar, belajarka utai ti baru (baka jaku bansa bukai, tauka belajarka muzik);
- Ngangkatka pemanah diri empu: ngatur ulah diri, ngurangka penekul runding, ngatur jam, ngatika diri, tauka ngurang jam meda televisyen;
- Nemuai ngagai endur bukai;
- Meri diri dikena mantu orang bukai.
Selamat Taun Baru – 2011
31 Dec 2010 Leave a Comment
in bidik, jaku, jereki, kenang, kereja, macha, menua, pendiau, pengawa, pengerai, pengerindu, pengidup, rindu Tags: basa, belajar, pengarap, pengelantang mensia, randau
Taun 2010 tu tadi aku enggau kami sebilik ‘ditiki’ mayuh bansa utai dalam pengidup kami. Pengidup tu baka roda – sekali kitai di baruh, lalu ba maya bukai kitai di atas. Enti nundaka ati, patut manah-manah mih utai ti datai, tang semua utai tu ari atur Tuhan magang. Pengidup tu mayuh bendar penguji mega. Penguji ngajar kitai awakka kitai bejimat agi neresa jalai pengidup.
Diambi ari laman web vanderbilt.edu
Taun 2011 tu, umur nyau manggai 48 taun, iya nya 4 kali 12 taun udah betukar-tukar, enti nundaka kalendar China. Taun 2011 tu iya nya taun jelu arnab ba kalendar China.
Ba umur 48 taun tu, aku bisi 10 taun da agi endur bekereja, laban ti udah milih diri ngetu kereja maya manggai umur 58 ila. Arapka diri gerai sereta regas baka selama. Semua tu bepanggai bendar ba pengasih enggau penyiru Allah Taala ba aku enggau kami sebilik.
Enggau tu, aku meri “Selamat Taun Baru – 2011″ lalu ngajih ke bala pemacha blog tu gayu guru gerai nyamai nguan menua. TUHAN enggau kita! SELAMAT!
Komen ke pengabis baru